لما يكمل إبنك سن ٦ شهور تقدرى تديله أكلات معينة بجانب الرضاعة. وفى
السن ده هو مش صغير عشان تبدأى تعوديه على عادات أكل صحية. لما تبدأى بدرى كده هو يتعود على الأكل الصحى لبقية حياته.دى شوية نصايح عشان تعودى طفلك على الأكل الصحى:
دورك إنك تقدميله نوعية كبيرة من الأكلات الصحية، ودور طفلك إنه يختار ياكل إيه منهم وياكل قد إيه. لو قرر إنه مياكلش حاجة متقلقيش، هتعوضها فى الوجبة إللى بعدها أو اليوم إللى بعده.
حاولى تفهمى الإشارات إللى طفلك بيديهالك عشان ده هيأثر على طريقة أكله فى المستقبل، يعنى لو طفلك غطى وشه بإيديه أو بعد الأكل، ممكن يكون شبع. متغصبيش طفلك أبدا على إنه يخلص طبقه.
متستعمليش الأكل كمحفز، يعنى متستخدميش الأكل كمكافأة لما يعمل حاجة كويسة، دايما خلى المكافأة حضن أو مديح.
إدى طفلك وقت يتعود على الأكلات الجديدة، لو قدمتى أكلة جديدة لطفلك ممكن يرفضها، إستنى كام يوم وقدميهاله تانى. الطفل ممكن يرفض أكلة من ١٠ إلى ١٥ مرة قبل ما يقدر يحدد بيحبها و لا لأ.
خلى غذاء طفلك متوازن، إنتى دلوقتى بتديله أكل أكتر. لو قدمتى حبوب، قدمى النوع المدعم بالحديد، وبالطريقة دى تضمنى إن طفلك بياخد إحتياجه من الحديد الضرورى لنموه بشكل صحى.