اختيار فرش وألوان غرفة المولود بيسبب حيرة كبيرة للأم الحامل والأب ،
وخاصة لما بيبقوا عايزين الغرفة تستمر مع الطفل لغاية مايكبر من غير مايغيروها ، والحيرة بتكون أكتر كمان قبل تحديد جنس الجنين ، ويفضلوا محتارين طيب نعمل الغرفة بألوان البينكات والروزات ولا ممكن يطلع ولد ، طب نعملها أزرقات ولا ممكن تطلع بنت ؟ وتستمر الحيرة ..
في ألوان محايدة وتمشي مع الاتنين .. من الألوان دي .. اللون الموف .. الموف بقى من الألوان اللي مش هتحيرك كتير ، لأن اللون الموف ممكن يستخدم في الغرف البناتي والأولادي ، ولو الغرفة مش هتتجدد لغاية مالأطفال يكبروا ، يبقى الأفضل في تأثيثها اختيار فرش يمشي مع الأطفال والكبار .. يعني الغرفة تبقى مكونة من سرير أو سريرين موجودين في الغرفة وكومود ودولاب ومكتب ومكتبة.. ونتجنب تماما السراير اللي بدورين والسراير اللي فيها حركات وطلوع ونزول .. أما لو في إمكانية للتغيير .. بمعنى إن الغرفة هتستمر مع الطفل من خمس لعشر سنوات وبعدين تتغير .. وقتها ممكن تستخدم السرير بدورين والأثاث اللي بيستخدم كأثاث وفي نفس الوقت يستخدمه الطفل في اللعب ..
في الصورة التالية هتلاقي المصمم استخدم درجات اللون الموف مع درجات الكريمي في مزيج رائع ، واستخدم الإكسسوار على حسب جنس المولود وسنه وده عشان يقدر يخلي الغرفة ملائمة للأولاد والبنات من حيث الألوان والإكسسوارات .. وملائمة لكل الأعمار من ناحية تانية لأن المصمم استخدم سراير تقليدية جدا مافيهاش حركة أو سلالم ..
خلي بالك :
1- الأطفال في السن الصغير بتحب أدواتهم تبقى على شكل لعب وأدوات يستخدموها في لعبهم حتى لو كان سرير أو مكتب .. دي حاجة لازم تتاخد في الاعتبار عند تصميم غرف الأطفال ..
2- لو هتستخد الباركيه في غرف الأطفال حاول يكون من أفضل الأنواع المقاومة للرطوبة .. ولو ما أمكنش ممكن تستبدله بالسيراميك على شكل باركيه
أتمنى إن الموضوع يكون نال إعجاباكم وانتظرونا في موضوعات أخرى ..
لمتابعة صفحتنا على الفيس بوك يمكنكم زيارة الرابط
http://decoronline.net/%D9%88%D9%84%D8%AF_%D9%88%D9%84%D8%A7_%D8%A8%D9%86%D8%AA/
